Qeymakamê Akyakaya navçeya Qersê Îsmail Demirtaş, projeya rêyên dewriyeyê ya ku ji bo zêdekirina ewlehiya sînor tê çêkirin, li cihê wê lêkolîn kir. Hat diyarkirin ku xebat bi lez berdewam dikin û proje wê şiyana tevgera hêzên ewlehiyê zêde bike.
Di çarçoveya "Karê Çêkirina Rêyên Dewriyeya Sînor" de ku ji bo dabînkirina ewlehiya li ser xeta sînor bi awayekî hîn bibandor tê meşandin, xebat bê navber berdewam dikin. Di vê çarçoveyê de Qeymakam Îsmail Demirtaş çû qadê û projeya ku tê meşandin li cihê wê lêkolîn kir. Qeymakam Demirtaş serdana qada xebatê kir û ji rayedarên fîrmaya peymankar û nûnerên saziyên peywendîdar derbarê rewşa dawî ya xebatan de agahiyên berfireh girt.
Qeymakam Demirtaş bal kişand ser girîngiya rêyên dewriyeyê yên ku wê tevkariyê li xurtkirina ewlehiya sînor bikin û destnîşan kir ku ev rêyên ku çêkirina wan berdewam dike, wê çûnaûhatina hêzên ewlehiyê ya li ser xeta sînor hêsan bike û bibe sedem ku li dijî rûdanên gengaz zûtir destwerdan were kirin.
Qeymakam Demirtaş ferman da rayedaran ku hesasiyeta pêwîst nîşan bidin daku xebat li gorî standardên kalîteyê û bi pabendbûna bi rêgezên tendurustî û ewlehiya kar bimeşin. Hat diyarkirin ku bi temambûna projeyê re, binesaziya veguhastinê ya li ser xeta sînor wê bihêztir bibe û çalakiyên ewlehiyê wê bi bandortir werin meşandin.
